不得不承認，衣家已經係串流同數碼化嘅年代。
近年聽音樂都比較偏向用串流平台或者係買無損格式，會買 CD 嘅多數都係冇無損格式或者係因為特典吸引（例如送某年演唱會嘅藍光碟）先買。當然仲有宗教原因，如「真綾教」。雖然係咁，但屋企都係有由中學開始買嘅 CD 一大堆，呢啲陪我成長嘅精神食糧，試問又點捨得掉咗佢？
但係如果你有試過用串流、數碼檔同直接用 CD 去聽同一隻碟、同一隻歌，你或者會發現，聽起來大家都各有不同。
如果你覺得冇分別，咁你可以噤上一頁喇（笑
就係因為咁，我開始搵 CD 機喇。由於我想用部 DAC 做解碼（畢竟用咗幾千銀買返嚟，梗係要好好利用佢），所以我嘅要求係一定要有光纖輸出，但係平價嘅 CD 機都冇呢個輸出，基於迷信我又唔想用藍光播放機，所以符合條件嘅，都係啲二千幾蚊或以上嘅機。但係呢啲機有三大問題：
- 貴
- 唔夠平
- 價格高
所以一直都未買。
直到見到呢個 project，號稱「重拾當年的感覺」嘅 CD 機—Amadana Music CD Player。淨機連日本本地運費大約九百幾港紙，價錢（相對地）唔算貴，就決定買佢返嚟。
包裝嘅感覺一般，比一般山寨貨感覺好少少。
機底印住 MIC，有四粒膠腳仔穏定機身減少震動。
正面睇冇咩問題仲幾靚仔，面蓋係聲稱唔知咩嘢膠，好似好勁咁，但望落都係硬膠一塊咁。只係果舊「木」其實都係一塊膠…
我最唔滿意係個機背造工唔好，而且個我用唔著嘅 USB port 感覺非常山寨。
開住蓋播都得，而且係要開住先㩒到啲掣…
買到嘅係後期改良版，光纖輸出係正確嘅 44.1kHz。早期版有問題，係得 32kHz（咁上下，唔記得），有日本網民笑言真係「回到當年聽收音機嘅感覺」。
最大優點係好細部，方便安置。
用左幾日，有興趣買嘅人有以下幾個點要留意吓：
- 始終冇遮冇掩，間中會有干擾聲。
- CD 唱盤卡得隻碟都幾實，攞返隻碟出嚟要出多少少力，我都有啲怕會啪斷碟。
- 光纖位卡唔實，比較容易扯甩光纖線。
- 只能以 USB Type-C 供電，冇內置電（所以可以安心轉運到香港）。但睇日本人講似乎可以用尿袋推，但係我冇試過。
- 有播放 USB 手指功能，亦支援轉 CD 做 MP3 落 USB 手指嘅功能，但對於我嚟講係冇用，所以我係冇試過。
- 可以駁藍芽喇叭/耳筒，但對於我嚟講都係冇用，所以我都係冇試過。
- 有 3.5mm 耳筒插，但對於我嚟講又係冇用，所以我又係冇試過。
0 Comments